Revelation of John 6
Nia noo
1Nomuli, gei au ga mmada gi Ta maa siibi e huge tahi noo i nia noo e hidu, gei au ga longono di manu e dahi i nia manu mouli e haa, e helekai be di lee atili, “Hanimoi!” 2Au ga mmada, ga gidee di hoodo kene. Tangada dela i hongo di maa le e daahi dana maalei, gei mee ga wanga ginai di hau king. Mee ga hana be taane maaloo hai heebagi belee haga magedaa ono hagadaumee. a3Nomuli, gei Ta maa siibi ga huge di lua noo, gei au ga longono di lua manu mouli e helekai, “Hanimoi!” 4Di hoodo labelaa ga hanimoi, di hoodo mmee. Tangada dela i hongo di hoodo deelaa, la gu wanga ginai di mogobuna e daamada dana dauwa i henuailala, e hai nia daangada gi hagadau dadaaligi ginaadou. Mee gu wanga labelaa ginai tulumanu dauwa damana. b
5Nomuli, gei Ta maa siibi ga huge di tolu noo, gei au ga longono di tolu manu mouli e helekai, “Hanimoi!”
Au ga mmada, ga gidee di hoodo luuli. Tangada dela i hongo di maa, e daahi ana pauna e lua i lodo dono lima. c 6Au ga longono eau di mee e hai be di lee e hanimoi i mehanga nia manu mouli e haa, e helekai, “Nia pauna palaawaa-‘wheat’ e lua, dela go di hui ngalua di laangi e dahi, gei nia palaawaa-‘barley’ e ono, dela go di hui ngalua di laangi e dahi. Hudee hunahuna ina nia laagau olib mo nia hadagee waini!”
7Nomuli, gei Ta maa siibi ga huge di haa noo, gei au ga longono di haa manu mouli e helekai, “Hanimoi!” 8Au ga mmada, ga gidee di hoodo gono kene. Tangada dela i hongo di maa, le e haga ingoo bolo “Made”. Gei di “Heidis”, ▼ e daudali a mee. Meemaa gu wanga ginai di mogobuna e daaligi dahi baahi e haa o henuailala, e daaligi gi tauwa, tau magamaga, nia magi, mo nia manu lodo geinga. e
9Nomuli, gei Ta maa siibi ga huge di lima noo, gei au ga mmada i lala di gowaa hai tigidaumaha gi nia hagataalunga o digau ala ne daaligi. Digaula ne daaligi, idimaa, digaula nogo hagadele nnelekai a God, gei nogo manawa dahi ang gi nadau haga modongoohia nnelekai a God. 10Digaula ga wwolo gi nua, ga heeu, “Tagi Maaloo dangihi, e haga madagu gei e donu! E waalooloo behee i mua dau hagi aga nia daangada i henuailala, ga hagaduadua digau ala ne daaligi gimaadou?” 11Digaula huogodoo ga wanga ginai nia gahu lloo kene dagidahi, ga helekai ginai bolo gi hagamolooloo dulii, gi dae loo gi taaligi o nadau ihoo gau hai hegau mo nadau duaahina huogodoo, ala ga daaligi be ginaadou ga odi.
12Gei au ga mmada gi Ta maa siibi e huge di ono noo. Gei tenua ga ngalungalua damana, gei di laa ga bouli dongoeho gadoo be di gahu luuli, gei di malama ga mmee hagatau be nia dodo. f 13Nia heduu ga too ia gi henuailala, gadoo be nia golee modo o di laagau-‘fig’ ne lulu go di madangi maaloo. g 14Di langi ga hagalee gadoo be di lau beebaa ne wiini, gei nia gonduu mo nia henua huogodoo ga haga maanege gi daha mo nadau lohongo. h 15Nia king o henuailala, nia dagi, nia dagi dauwa aamua, digau maluagina, digau mogobuna ge aamua, mo nia daangada huogodoo ala i golo, nia hege mo digau moholo ang gi ginaadou, ga pala hagammuni i lodo nia lua mo i lala nia hadugalaa o nia gonduu. i 16Digaula ga wwolo gi nia gonduu mo nia hadugalaa, “Tooia gi madau nua, e hagammuni gimaadou i nia golomada tangada dela e noho i hongo di lohongo king, mo i di hagawelewele o Ta maa siibi! j 17Di laangi hagamadagudagu dangada o nau hagawelewele la gu dau mai, koai dela e mee di duu aga e hai baahi gi di maa?” k
Copyright information for
KPG